Sant'Ambrogio

Carlo della Valle ha proposto nel suo "Famose poesie italiane tradotte 'a lengua" alcune delle più famose e "storiche" poesie della letteratura italiana in napoletano.
Vi proponiamo oggi, dopo la dantesca Tanto gentile e tanto onesta pare e la Cavalla storna del Pascoli , la celebre Sant'Ambrogio di Giuseppe Giusti.

Il libro di Carlo della Valle è reperibile al seguente link :

Sant'Ambrogio

"Scellenza, vuie ca nun me suppurtate
pe ‘sti juoche ca faccio quacche vota,
e cuntrario a ‘o tedesco me penzate
pecchè manno ‘e fetiente dint’’a lota,
sentite mò chello ca m’è attuccato
‘na matina ‘e nu juorno galiota
dinto a ‘na chiesia vecchia, ccà a Milano,
Sant’Ambrogio, nu poco foremano.

Steva cu me nu figlio guagliunciello
‘e una ‘e chelli cape gruliuse,
Alessandro, chillo d’’o rumanziello
annummenato: ‘e Prumesse Spuse;
nun l’avite liggiuto ‘stu gioiello?
Iammo, Scellenza, nun cercate scuse
dicenno ca tenite ati penziere,
jettanno ‘o riesto dint’’e saiettere!

Nce traso e ‘a trovo carreca ‘e surdate
ca so’venute da l’ati nazione,
vene a dicere ‘e Bueme e ‘e Cruate
ca so’ venute a fa l’accupazione:
stevano tutte tiseche ‘mpalate
comme all’attenti dinto a nu plutone,
cu ‘e baffe capezzute e chella faccia
ca pure ‘nnanze a Dio era minaccia.

Restaie areto; propio nun vulette
vicino a ‘sti fetiente rummanere,
pecchè io ‘e schifo assaie chesti sanguette,
mentre ca vuie ‘e trattate pe mestiere.
Pure accussì, nu fieto se sentette
‘e sivo ascì da chelli buttunere,
tanto ca se ‘mpurpaino ‘e chell’addore
pure ‘e cannele ‘e l’altare maggiore.


Mentre ‘o prevete steva cunzacranno
l’ostia santa pe darce ‘a cummunione,
sentette chiano, doce, senza ‘nganno,
‘na banna ca faceva certi suone
cu ‘e tromme ‘e guerra, e me parette tanno
ca fosse ‘a voce d’’a pupulazione,
ca doppo ch’era stata sott’’a sferza
se chiagneva ogne cosa ch’êva perza.

Era nu coro ‘e Verdi: ‘o coro a Dio
d’’e Lumbarde ca stevano assetate:
chillo “Signore dal tetto natio”
ch’ha fatto sentì a tante comme a frate.
Allora cuminciaie a cagnà pur’io
comme fossero tutte addeventate
‘na gente sola, e me truvaie ammescato
dint’’a rocchia senz’esserme addunato.

Che v’aggia dì, ‘Scellenza, ‘o piezzo è bello,
e po’ è nuosto, sunato cu mestiere,
fatto assieme cu l’arte e cu ‘o cerviello
senza strunzate o cu male penziere.
Ma quanno fuie fernuto ‘o returniello,
turnaie a penzà comme penzavo aiere,
ma all’intrasatta, pe me fa ‘e dispiette,
‘a chelli vocche ch’erano ‘e crapette

na canteca tedesca, moscia assaie,
ascette e po’ vulaie pe dint’’o cielo.
Pareva n’urazione, me penzaie
sentennola accussì, comm’a nu velo:
e chillo suono ‘ncuorpo m’arrivaie
e ‘o tengo ‘a dinto comme a nu vangelo,
e nun me spieco comme ‘sti sfurcate
putessero fa’ buono ‘sti cantate.


Era nu canto bello, doce e amaro,
uno ‘e chille ca, quanno ero guaglione,
me cantavano ‘a casa e, paro paro,
m’arricudava, sempe cu passione,
quanno ‘o pensiero ‘e mammema chiù amaro
m’’o cunfurtava pe cunsulazione,
e quanno me sentevo assai luntano
pareva comme me tenesse ‘a mano.

Fernette. e me venette nu penziero
uno sempe chiù forte, chiù priciso:
chiste songo mannate, chesto è overo,
‘a casa nosta da chillo Re ‘mpiso
tutto apprettato, e nun fa nu mistero,
e pe cchesto putesse murì acciso,
‘e fa stà sott’’o paccaro, e luntane
da’’e terre lloro, nuie e 'sti scauzacane.

Paricchie ‘e chiste veneno trattate
comme a schiave, e forze manco ‘o sanno
ca songo sulamente cummannate
pe fa nascere l’odio, fino a quanno
taliane e tedische, l’une e l’ate,
sempe chiù assaie nemice restarranno,
accussì chi ‘e guverna sta sicuro
‘e nun avè surprese p’’o futuro.

Povera gente! Senza ‘na famiglia,
dinto a ‘na terra ca nun’e supporta,
chi sa si po’ cu tutta ‘sta schiattiglia
nun ghiastemmano pe ‘sta mala sciorta
a chille c’hanno miso chesta vriglia.
Iammo! e’ meglio ca jesco da ‘sta porta,
ca si no uno ‘e chiste me l’abbraccio
pecchè nun saccio chiù chello ca faccio! "